CAGAYAN DE ORO CITY – Kasado na ang pagpahimo ni City Mayor Rolando ‘Klarex’ Uy sa iyang ikaduhang State of the City Address o SOCA dungan sa pagsaulog sa ika-74 ka tuig nga charter day sa Cagayan de Oro City ugmang adlawa.
Kini ang gibatbat sa tigpamaba ni Mayor Klarex nga si Janboy Actub sa Bombo Radyo kabahin sa kaandam na sa kasaulugan sa karta sa dakbayan ug SOCA ning tuiga.
Namahayag si Actub nga hayan molungtad sa sobra’g oras ang pagbatbat sa mayor sa iyang tinuig nga SOCA nga himoon sa Aquilino ‘Nene’ Pimentel International Convention Center sa Sitio Taguanao,Barangay Indahag ning syudad ugmang adlawa.
Gipasabot niini nga mo-sentro ang pagtuki ni Uy sa iyang RISE agenda nga kaluhaan sa nagkadaiyang kalampusan sa matag-departamento sa city hall.
Gilauman usab ang pagtambong sa nagkadaiyang regional directors sa nagkadaiyang national line agencies nga dunay mga buhatan nga nakabase dinhi sa dakbayan.
Kini na ang ikaduhang SOCA ni Klarex nga gihimo susamang venue sukad kini napili nga mayor sa dakbayan.
