CAGAYAN DE ORO CITY-Giimbestigaran sa Bureau of Fire Protection ang posibilidad nga electrical o napasagdan nga niluto ang hinungdan sa pagkaugdaw sa duha ka andana nga panimalay sa San Vicente, Brgy Puntod ning syudad.
Matud ni Senior Fire Officer 1 Imelda Barasan sa BFP nga namatay ang mga biktima tungod sa suffocation ayha nasunog.
Hisayran nga halos dili na maila ang patay’ng lawas sa lima ka biktima nga nasunog sa dihang nakuha kini sa mga personahe sa Scene of the Crime Operatives o SOCO.
Gisaway usab sa BFP ang kakulangon sa fire exit sa panimalay sa pamilyang Cerillo.
Matud ni Barasan nga kini ang hinungdan nga nalukong ang mga biktima ug na-suffocate sa aso kay naglisod man sila sa paggawas.
Usa usab sa mga hinungdan kon nganong dugay nakaggawas ang mga biktima tungod sa mga barb wire nga gipalibot sa ilang gate.
Hisayran nga nagsugod ang sunog sa unang andana sa panimalay nga gikamatay sa mga biktima nga sila si Louie,10 nga special child; Michelle,13; Mary Grace,12; Mark Kenneth Cerillo ,21 ug Connie Nandong.
Samtang ubos pa sa ‘state of shock’ ang inahan nga survivor sa sunog nga si Melody Cerillo human tulo sa iyang anak ang kabahin sa lima nga namatay sa dihang gilamoy sa kalayo ang ilang panimalay.
Giila usab nga bayani sa upat ka mga survivor nga sila si Mary Joy Cerillo; managsoon nga sila si Tir Jun ug Lilibeth Carillo ang usa sa mga namatay nga si Mark Kenneth Cerillo, 21-anyos tungod kay giluwas ang ilang kinabuhi hulip sa iyang kamatayon.
Una nang gibutyag sa silingan nga si alyas Boy nga nakita niya nga miggawas sa panimalay si Mark aron i-park ang iyang motor apan nakadungog kini’g kusog nga singgit hinungdan nga misaka kini’g balik ug wala na makaggawas.
Giangkon sa silingan sa pamilyang Cerillo nga wala sila makamatikod nga nasunog na ang duha ka andana nga panimalay niini.
Si alyas Boy miingon nga dako na lamang ang ilang katingala tungod kay na-ugdaw na ang panimalay sa maong pamilya.
Gani, maoy ilang nadunggan ang singgit sa ikaduhang andana sa balay.
Hisayran nga wala na mikaylap pa sa laing panimalay ang sunog tungod sa taas nga firewall sa likod nga bahin sa panimalay.
