CAGAYAN DE ORO CITY – Disiplina sa kaugalingon ang nakit-ang solusyon ni City Mayor Oscar Moreno aron mabatukan ug malikayan ang COVID-19.
Kini ang reaksyon sa mayor alayon sa sugyot sa pipila ka residente nga ipaubos sa lockdown ang dakbayan gumikan sa virus.
Gitawag ni Moreno nga magul-anon ug lisud nga operasyon ang lockdown tungod kay dako kini’g mahatag nga epekto sa ekonomiya sa syudad.
Dugtong niini, giawhag sa mayor ang mga nanawagan sa lockdown nga mas maayo nga sugdan na nila pag-quarantine ang ilang kaugalingon pinaagi sa pagpuyo sulod sa ilang tagsa-tagsa ka panimalay.
Samtang bisan si Misamis Oriental Gov Bambi Emano ang dili kampante nga ipaubos sa lockdown o community quarantine ang 23 ka lungsod ug duha ka syudad sa lalawigan tungod sa bahad sa coronavirus disease.
Kini bisan kon may pipila ka residente ang nagsugyot nga angay nang ipaubos sa kuwarantinas ang lalawigan ilabina nga diha moagi ang daghang mga tawo ayha makaabot dinhi sa syudad.
Miingon si Emano nga kontento na kini sa state of calamity nga gipatuman niini aron paspas ang pag-responde sa mga matag-lungsod kon dunay mga residente nga mag-positibo sa maong sakit.
