CAGAYAN DE ORO CITY-Misaka pa sa 492 ka mga sakop sa Maute-ISIS ang gitumbok nga napatay sa mga sakop sa mga Armed Forces of the Philippines o AFP sa Marawi City.
Sumala ni Joint Task Force Marawi spokesperson Capt. Joan Petinglay nga nagpabiling anaa sa 114 ang ihap sa n amatay’ng mga sundalo ug 45 gikan sa mga sibilyan.
Malampusong na-rescue sa mga sundalo ang usa ka Marawi Siege survivor nga mipuyo sa warzone sulod sa duha ka bulan kagahapong adlawa.
Ang survivor, kinsa wala pa hinganli, nagpabiling nagpaalim sa Amay Pakpak Medical Center sa Marawi City tungod sa nasinatiang grabeng truma.
Samtang wala nay balita ang mga kasundaluan sa labing ulahing kondisyon sa dinagit na paring si Fr. Chito Suganob.
Kini maoy unod sa gihimong press conference sa mga naglangkon sa Joint Task Force Marawi.
Segun sa report anaa na lamang sa 50 hangtud 80 ang gihuptang hostage sa mga lokal nga terorista kinsa maoy ilang gigamit sa pagpadaghan sa ilang ginamang bomba kon Improvised explosive device o IEDs.
Gitin-aw sa AFP nga halos wala na silay snipers nga gakasiplatan tungod kay landmines na ang ilang hugot nga gibantayan nga malatayan ning higayona.
Gilusad usab ang mass vaccination alang para sa mga sundalo aron pakigbatokan ang sakit sama sa dengue, malaria, typhoid fever ug diarrhea.
