CAGAYAN DE ORO CITY-Nangayo’g pasaylo si Ozamiz City Police Station commander C/Insp Jovie Espenido sa gidangatan nga kamatayon sa iyang nahimo nga higala nga si Mayor Reynaldo ‘Aldong’ Parojinog Sr.
Giangkon ni Espenido nga nakahilak siya nga misud-ong sa kamatayon ni Parojinog Sr samtang nagpatuman ang PNP sa mando sa balaod nga pang-embarguhon ang mga armas niini sa ilang mga pinuy-anan.
Gibutyag ni Espenido nga dili usab niya mapugos ang mga kabanay sa mga Parojinog ug supporters niini kon dili sila makapasaylo kaniya.
Samtang gipatoo sa pamilyang Parojinog nga sila kabus ug walay dagkong kabtangan nga napondar samtang naghupot sila sa posisyon sa Ozamiz City.
Kini human unang gipanganlan ni Pres Rodrigo Duterte sila si City Mayor Reynaldo Parojinog Sr ug Vice Mayor Nova Princess Parojinog nga nagpadagan sa shabu operation sa maong syudad.
Gihimo ni Espenido pahayag tungod sa ilang pagka-diskobre sa mansion sa mga Parojinog nga gipadali-dali’g pagguba niadtong Pebrero ning tuiga.
Nagtoo si Espenido nga gipaguba ang maong mahalong balay ug nagpuyo ang mga Parojinog sa ilang
ancestral house aron dili masaypan nga sila nalambigit sa gidiling droga.
Dugtong niini,gibulgar sa nagpaila nga hitman sa pamilyang Parojinog ang daghan na’g napapatay nga mga tawo ug mga opisyal sa gobierno sa Ozamiz City.
Kini human gisulti sa maong hitman nga tinood nga anaa sa lapad nga kalihukang ilegal sila si Parojinog Sr,Ricardo Parojinog ug Vice Mayor Nova Princess Parojinog sa maong dakbayan.
Apan tubag usab sa abogado ni Nova Princess nga si Atty Ferdinand Topacio nga angay panumpaan sa maong hitman atubangan sa korte ang ipanulti niini aron siya matu-ohan.
Namugos si Topacio nga walay koneksyon ang exposy sa hitman sa kamatayon ni Parojinog Sr ug laing 15 ka mga tawo.
