CAGAYAN DE ORO CITY-Andam na ang Land Transportation Office o LTO-10 nga ibalhin ang extension office sa Brgy Agusan gikan sa Puerto karong adlaw’ng Lunes.
Kini bisan miani sa pagsaway ang lakang nga gihimo sa ahensiya.
Matud ni LTO-Puerto District Officer Kim Darimbang nga ila nang gisugdan ang pag-inventory ug paghakot sa ilang mga kagamitan aron ila nang maablihan ang bag-ong opisina sunod semana.
Samtang giangkon ni Darimbang nga gisayangan siya sa pagbalhin sa ilang extension office.
Siya miingon nga aminado siya nga daghan ang mawad-an sa panginabuhian tungod sa maong lakang.
Apan, gitin-aw niya nga daghang mga factors ang angayang ikonsidera sa ilang ahensiya aron mas mapalapdan pa ang ilang pagserbisyo sa 75-mil ka mga kliyente.
Mihatag usab sa katin-awan si Agusan Brgy Kap Andrew Melisa nga dili siya ang nagtanyag kang LTO regional direcor Oscar Salcedo nga ibalhin sa iyang area of responsibility ang extension office sa LTO.
Sumala ni Melisa nga nangita’g luna si Salcedo ug maoy napili niini ang Brgy Agusan.
Giklaro usab ni Melissa nga wala sila’y pangayoon nga renta sa yuta gikan sa LTO.
Siya miingon nga libre ang pag-okupar sa LTO sa maong luna nga gipanag-iyahan sa barangay.
Asoy pa niini nga maoy mahinungdanon kaniya nga mahatagan og dugang panginabuhian ang mga residente sa maong lugar tungod sa pagbalhin sa extension office.
Dugang pa niini, nga gisupak pa ni City Mayor Oscar Moreno ang napili nga luna ni Salcedo tungod kay giggahin kini alang sa TESDA apan mihangyo ang direktor nga mangayo’g gamay’ng espasyo.
