CAGAYAN DE ORO CITY- Nasanta sa PNP ug AFP ang mga plano sa mga armadong pundok nga mohimo’g pagpanghasi samtang gidumdom sa publiko ang adlaw sa mga santos ug kalag dinhi sa rehiyon.
Kini ang rason nga gideklarar sa kapolisan ug militar nga generally peaceful ang maong kalihukan.
Gibutyag ni PNP regional spokesperson Supt Lemuel Gonda nga subay sa impormasyon nga may mga robbery gang nga mosulod unta ilabina sa syudad aron manulis apan napugngan tungod sa hugot nga seguridad sa rehiyon.
Apan gipadumdom usab ni PNP regional director C/Supt Timoteo Pacleb nga dili gihapon ipaubos ang taas nga seguridad ilabina nga nagpabilin ang bahad sa terorismo ug insurhensiya.
Samtang gitawag sa militar nga pagpanglipat lamang ang anunsyo sa pundok NPA nga sila mohimo’g pagpanghasi sa bisan asa nga bahin dinhi sa rehiyon.
Kini maoy pagsabot sa militar kabahin sa ulahi nga ilang na monitor kuyog ang kapolisan nga mohimo’g pagpangtake ang mga rebelde mismo sa adlaw sa mga santos ug kalag.
Miingon si 4th ID spokesperson Capt Joe Patrick Martinez nga nasanta nila ang mga plano sa mga rebelde tungod usab sa sayo nga pagreport sa katawhan nga wala makagusto sa mga abuso niini.
