Nagpabilin nga ₱65 ang kasamtangang provisional flagdown rate sa mga taxi sa Cagayan de Oro taliwala sa mga panawagan sa pipila ka pasahero nga ibalik kini sa mas ubos nga pletehan.
Gitin-aw ni CAFITADA President Bernie Jamaca nga ang Land Transportation Franchising and Regulatory Board o LTFRB National lamang ang bugtong buhatan nga adunay katungod sa pagbawi o pagpagawas og bag-ong order bahin sa pletehan sa taxi.
Gipasabot usab sa opisyal nga dili pa break-even alang sa mga drayber ang kasamtangang dagan sa presyo tungod kay nagpabilin sa ₱13.50 ang matag kilometro ug ₱2 lang ang waiting time imbes sa ilang gipangayo nga increase.
Hinuon, gipasalig ni Jamaca nga padayon nilang obserbahan ang presyo sa lana sa mosunod nga mga bulan ug andam ang grupo nga magduso og petisyon sa LTFRB alang sa fare reduction kun magpabilin nga ubos ug stable ang presyo sa lana.
