PC:Nelson S. Acenas
CAGAYAN DE ORO CITY-Nakabalik na ang dul-ag libo ka residente nga mihikling gikan sa ilang mga pinuy-anan sa pipila ka brgy sa lungsod sa Balingasag ug Lagonglong,Misamis Oriental.
Kini human sudli sa tubig-baha epekto sa walay hunong nga pagbundak sa pag-ulan resulta sa presensiya sa bagyong Urduja nga nahimutang sa Eastern Samar sa Visayas.
Gibutyag ni PDRMMD head Fernando Dy Jr nga pipila ka balay ang nangaguba sa lungsod sa Lagonglong samtang stranded usab sa unom ka oras ang mga motorista tungod sa dala nga peligro sa Musi-Musi Bridge sa Balingasag ning lalawigan.
Dugang ni Dy nga nagsuspenso usab sa klase ang lungsod sa Claveria,Balingasag,Lagonglong ug Opol gumikan sa kabalaka nga maapektuhan ang mga magtutudlo ug mga tinun-an kagahapong adlawa.
Samtang naluwas ang lima ka mangingisda nga naanod sa dagkong balod samtang nanagat sa kabaybayonan sa Balingasag, Misamis Oriental kagahapon sa buntag.
Gibutyag ni Joselito Sabugaa, municipal disaster risk reduction management officer sa maong lungsod nga maoy naluwas sila Toto Llagas, Remy Romeral, William Arayon, Chanel Aragon ug Nelson Agaron Jr nga pulos nagpuyo sa maong lungsod.
Si Sabugaa miingon nga ang duha sa nasalbar molopyo sa Brgy 3-Poblacion, samtang ang laing tulo nagpuyo sa Brgy 6-Poblacion.
Una niini, nakasinati sa pagdagko sa balod ang kadagatang bahin sa maong lungsod tungod sa presensya ni bagyong Urduja nga ang ruta atua sa Visayas region.
