CAGAYAN DE ORO CITY-Hatagan ni Provincial Gov Jose Maria Zubiri sa ayudang pinansyal ang mga lungsod nga apektado sa 5.3 magnitude nga linog nga miigo ilabina sa lungsod sa Kalilangan,Bukidnon.
Gibutyag ni Bukidnon PDRRMC chief Johan Israel Damasco nga gipatawag ni Zubiri ang tanang city ug municipal disaster officers aron mo-report sa damyos sa linog sa ilang mga lungsod.
Gani,gibana-bana nga anaa sa 11 milyon pesos ang damyos sa Kalilangan kay sila ang grabe kaapektado sa linog.
Apektado dul-ag 500 ka pamilya sa linog diin gikan sa pipila ka lungsod sa miaging kadlawon sa Domingo.
Samtang nagkadaghan ang pamilya nga apektado sa pagtay-og sa 4.2 magnitude nga linog sa Wao,Lanao del Sur.
Kini human nawad-an sa ilang pinuy-anan ang kapin mil-300 ka pamilya diin nangatulog na lamang sa dakong hawan sa maong lungsod.
Gibutyag ni Francis Garcia,hepe sa Wao Disaster Risk Reduction and Managment Council nga 15 milyon pesos na ang initial nga damyos sa kabtangan ang natala sa maong linog.
Misaka na usab sa 10 ka tawo ang naangol gumikan sa trahedya.
Gani,gisusi na sa mga opisyal nila gikan sa Lanao Sur LGU ug ARMM ang sitwasyon sa kapi’g 20 ka brgy nga naigo sa linog.
