CAGAYAN DE ORO CITY – Misaka na sa 53-mil ka tawo ang namatay sa pinakaulahing pakig-away sa 202 ka kanasuran nga apektado sa coronavirus disease o COVID-19.
Kini human natala na sa uno milyon,7-mil 626 ka pasyente na ang natakbuyan sa maong sakit sukad nadiskobre didto sa Wuhan City,China.
Miingon si World Health Organization o WHO Dir Gen Tedros Adhanom Ghebreyesus nga sa kapi’g milyon ka pasyente,210-mil 583 pa lamang ang nakarekober samtang 37-mil 712 usab ang anaa sa peligro nga kahimtang.
Dugang ni Ghebreyesus nga miabot na ang ilang gikabalak-an nga gindaghanon sa mga pasyente nga naigo sa bayrus diin una na sila nanawagan nga unta lig-ong mga pakigbatok ang himoon sa matag-kanasuran nga apektado niini.
Samtang misaka pa sa 2,633 ang ihap sa mga tawong na-positibo sa COVID-19 sa Pilipinas. Kini human natala sa Dept. of Health o DOH ang 322 ka bag-ong kaso sa coronavirus kagahapong adlawa.
Gibutyag ni DOH Secretary Francisco Duque III nga misaka usab sa 107 ang ihap sa mga namatay human makabsi sa kinabuhi ang 11 ka pasyente.
Samtang nadugangan sa usa ang ihap sa mga pasyenteng naka-recover sa bayrus ug misaka na kini sa 51.
Subling gihangyo ni Duque ang publiko nga tumanon ang social distancing, magpuyo sa balay ug kanunay’ng manghugas sa kamot aron makalikay sa coronavirus.
