CAGAYAN DE ORO CITY, Philippines – Siyam ka mga balay ang hurot ka ugdaw ug duha ang parsyal nga nadamyos sa sunog Purok 10, Barangay Tablon, ning syudad.
Namahayag si Fire Sr. Inspector Kyle Bryan Lauzon, Chief Operations Branch sa BFP Cagayan de Oro Fire District nga gipanag-iya sa pamilyang Bolo ang balay nga unang nasunog ug mitabok kini sa mga silingan.
Paspas nga mikuyanap ang kalayo tungod kay gama sa light materials ang naugdaw nga mga balay.
Gibana-bana nga anaa 116,000 pesos ang inisyal nga damyos sa sunog.
Wala pay labot niini ang pagkasunog sa dakung truck nga nagparking kilid sa nasunog nga tindahan.
Padayong gipangita sa BFP kuyog ang Cugman Police Station ang bata nga si “Reymart”, usa ka PWD, ug kabanay sa pamilyang Bolo.
Base sa inisyal nga imbestigasyon, nagsugod ang kalayo sa balay nga gipanag-iya sa pamilyang Bolo, dihang dunay mibusikad sulod sa ilang puy-anan.
Miabot sa ikatolong alarma ang gidak-on sa sunog.
Blangko pa ang mga otoridad sa hinungdan sa sunog.
