(Update) CAGAYAN DE ORO CITY – Ipadayon karong adlawa sa retrieval team ang pagpangita sa nabiling duha ka empleyado sa munisipyo ug sa magtiayon nga pabiling natabunan sa nahugnong yuta sa Sitio Mabuhay,Brgy San Luis,Malitbog,Bukidnon.
Kini aron mahaw-as ang gitoohang patay nang lawas sa mga biktima nga payloader operator Nerio Talines,dump truck driver Raffy Simpruta ingon man sa magtiayon nga si Lucrecio ug Angelita Labronal nga pulos nagpuyo sa maong lungsod.
Gihimo ni Bukidnon Provincial Police Office spokesperson Maj. Jiselle Longgakit ang pahayag human narekober na ang truck helper nga si Jordan Vincent Achas tungod sa tabang sa K-9 dog kagahapon sa hapon.
Miingon si Longgakit nga pabilin sila nagtoo sa milagro ug untaa may sinyales pa sa kinabuhi sa natabunang mga biktima nunot sa trahedya.
Nakigsilong lamang ang maong municipal workers gikan sa ilang road clearing operation sa puy-anan sa magtiayong Labronal sa dihang kalit nahugno ang nagbuntod nga yuta padulong sa ilang lokasyon sa miaging adlaw’ng Lunes udto.
Hisayrang magpila usab ka adlaw nga nakasinati sa pag-ulan ang Northern Mindanao sa hinungaw sa bagyong Neneng nga atua sa Northern Luzon diin naghatag sa mga pagbaha nga naglakip sa Bukidnon padulong sa Misamis Oriental ug Cagayan de Oro City.
