CAGAYAN DE ORO CITY – Mikalas na sa usa ka sakop sa armadong grupo ang engkuwentro tali sa kapolisan sulod sa upat ka sitio sa Brgy Kabadiangan,Kadingilan,Bukidnon sa miaging kadlawon.
Kini ang gikompirmar ni Bukidnon Provincial Police Office spokesperson Police Maj. Jiselle Longgakit dungan sa pag-ilan sa namatay’ng suspek nga si Hilario Campong.
Miingon si Longgakit nga unang gilusob sa dili mominus 60 ka armadong tawo nga naggikan sa North Cotabato ang police-base nga nahimutang sa maong brgy hinungdang nagka-engkuwentro sa tunga sa oras.
Kini ang rason nga nag-resulta usab sa pagpangbakwit sa daghang mga pamilya gikan sa upat ka sitio sa maong brgy padulong sa mas luwas nga bahin sa lungsod.
Wala pa kompirmaha sa PNP ug AFP kon unsa nga grupo ang gika-engkuwentro sa mga pulis sa maong lugar apan nanglugwa ang report nga nagsumikad ang bangi tungod sa pag-inilogay sa yuta tali sa mga lumad sa Bukidnon ug pipila ka igsoong Muslim nga gikan sa Carmen,North Cotabato.
Miabag usab ang ubay-ubay’ng batalyon sa mga sundalo gikan sa Eastern Mindanao Command nga nakabase sa Davao City sa Bukidnon PNP aron mapugngan ang pag-grabe sa sitwasyon.
Samtang miapelar si Kadingilan,Bukidnon Mayor Jerry Canoy Jr ngadto sa mga opisyal sa lungsod sa Carmen,North Cotabato nga gilayon nang mohimo’g aksyon tungod sa isyu sa bangi sa yuta sa duha ka panig.
Kini human nag-resulta sa lapad nga pagbakwit ang maong pagsulong sa 60 ka armadong tawo sa patrol base sa PNP nga nahimutang sa Bukidnon sa miaging kadlawon.
Miingon si Canoy nga unta dili na modako pa ang isyu aron mabalik na sa normal ang kahusay’g kalinaw sa ilang lungsod.
Hisayrang kabahin gatusang pamilya ang nangbiya sa ilang balay tungod sa kalisang sa panag-engkuwentro sa PNP ug armadong pundok diin may namatay na sa miaging kadlawon.
