(Update) CAGAYAN DE ORO CITY – Gipatutukan ni City Mayor Klarex Uy sa City Social Welfare Development o CSWD ang walay hunong nga pag-atiman sa sobra 300 ka pamilya nga apektado sa pagbaha sa Brgy Bugo ug Puerto ning syudad sa miaging Domingo.
Kini human ipalanog ni City administrator Atty Hilario ‘Roy’ Raagas ang hangyo usab sa mayor nga bisan ang mga empleyado sa city hall ang boluntaryo mohatag sa kon unsa man ang ilang magahom alan sa mga biktima.
Siya miingon nga mangita pa’g dugang paagi ang city hall aron makatunol sa gikinahanglang tabang sa sobra libo ka residente nga nahasol gumikan sa kalit nga pagsaka sa tubig-baha sa pipila ka mga sapa sa maong mga brgy.
Samtang mihangyo usab si CSWD overseer Pastor Dimver Andales nga mahatagan sa panginahanglang ‘personal hygiene’ ang mga biktima sa baha sa Brgy Puerto ug Bugo ning syudad.
Kini tungod kay sagad sa mga biktima ang tapot-lawas lamang nga naka-dalikyat sa gipahimutang nga evacuation centers kay nahurot pagkabasa ang ilang mga senina.
Miingon si Andales nga kulang pa ang natunol nga tabang sa city hall alang sa mga biktima rason nga sila nangayo’g dugang ayuda gikan sa nagkadaiyang sektor sa syudad.
Hisayrang sa maong pagbaha,nalumos-patay ang kanhi sekyu nga si Artemio Gonzales sa Brgy Bugo kay gitinguha niini maluwas ang iyang kaugalingong pamilya.
