CAGAYAN DE ORO CITY-Patay ang usa sa unom ka linemen sa kompanyang PLDT samtang dunay giayo nga linya sa telepono sa Brgy Balbagon,Mambajao,Camiguin.
Giila ni SPO3 Leny Bana sa Mambajao Police Station ang namatay nga si Jerome Abog Moleño,hingkod ang panuigon ug molopyo sa Brgy Cabalantian, Manticao,Misamis Oriental.
Miingon si Bana nga midikit ang PLDT line sa live wire Camiguin Electric Cooperative hinungdan nga nakuryentahan ang mga biktima.
Samtang nadala usab sa ospital sila si Brendo Gulane, 45 anyos;Renel Lamoste ug Joel Balabat nga pulos taga Manticao;Mario Acenas Jamito, 49 anyos, taga Balingasag ug Barry Faelnar nga taga Brgy Iponan ning syudad.
