CAGAYAN DE ORO CITY – Gisugat sa sakit nga balita ang pag-obserbar sa Fire Prevention Month ang Bureau of Fire Protection o BFP-Cagayan de Oro District sa syudad ning tuiga.
Kini human mikalas sa kapi’g tuig nga batang lalaki ang miigo nga sunog sa Sitio Manggahan,Brgy Balulang ning dakbayan kagahapon sa hapon.
Giila ni Balulang Punong Brgy Edwin Micabani ang biktima nga si Carl Anthony Corpuz nga apil sa pagkapaig dihang gilamoy sa kalayo ang dul-an 20 ka balay.
Namahayag si Micabani nga subay sa inisyal nga imbestigasyon nga igo lang migawas sa balay ang inahan dihang kalit ang pag-ulbo sa kalayo rason nalukong ang bata sulod niini.
Naluwas na unta sa uyuan ang bata apan nabuhian kini dihang mipadulong usab kaniya ang nagkalayo nga trapal hinungdang hingpit nakabsan kinabuhi ang bata.
Subay usab ni BFP Carmen Station commander SFO4 Emmanuel Paculba nga gisuta pa nila ang rason sa sunog nga unang nabaniug nga gikan sa balay nila ni Cristie Beligulo ayha mikaylap sa mga silingan ug pasiunang mitala’g structural damage nga 350-mil ka pesos.
Samtang nasubo ang Bureau of Fire Protection o BFP-Cagayan de Oro District nga laing hitabo sa sunog ang midamyos sa daghang kabalayan ug mikutlo’g kinabuhi sa bata diha sa Brgy Balulang ning syudad.
Kini samtang nag-kickoff na ang BFP-Central Office sa Fire Prevention Month sulod sa Marso ning tuiga.
Miingon si BFP-CdeO District spokesperson Fire Insp. Sam Velarde nga taliwala sa subo nga hitabo sa Brgy Balulang,padayon ang ilang pagpahigayon sa anti-fire prevention month awareness activities sugod ning adlawa.
Una nang gika-alarma ang taas nga ihap sa mga sunog sa syudad sugod Enero hangtod Pebrero diin mitala na’g duha ka kinabuhi ang nakalas ug upat ang mga samaron.
