CAGAYAN DE ORO CITY – Misaka na sa 10 ka brgy ang Ipaubos sa imbestigasyon sa DILG sa pasangil nga nakahimo’g anomaliya sa pagpanghatag sa Social Amelioration Program o SAP sa mga kabus nga pamilya ning syudad.
Kini human nakaabot sa DILG -Central Office ang yangu-yango sa katawhan diin kabahin sa ilang reklamo ang SAP assistance discrepancy ug pakyas nga pagpatuman sa quarantine protocols sa novel coronavirus disease-2019 crisis ubos sa ilang area of responsibility.
Gibutyag ni DILG Undersecretary for Barangay Affairs Martin Diño nga adunay mga lig-ong ebidensya nga nagmatood nga napakyas ang barangay sa pagpatuman sa physical ug social distancing; reklamo nga gipili sa opisyal ang pagpanghatag sa relief goods; barangay official nga namaligya sa quarantine pass ug ID; ingon man anomaliya sa pagpang-apod apod sa SAP sa gobyerno.
Kabahin sa barangay sa syudad nga ginganlan ni Diño ang Brgy Canitoan sa syudad.
Samtang nagbahad si Diño nga malangkat sa puwesto ang brgy kapitan nga nalambigit sa anomaliya sa SAP sa gobyerno.
Miingon si Diño nga patong-patong nga kaso ang atubangon sa brgy opisyal nga gilakipan sa falsification of documents ug malversation of funds.
Dugtong niini, dako ang posibilidad nga mapapha sa puwesto ug mabilanggo ang mga opisyal nga mikurakot sa kuwarta sa katawhan.
Una nang miggawas ang report nga upat ka brgy kapitan sa syudad ang giimbestigaran sa PNP-CIDG 10 kalabot sa SAP anomalies diin usa ang gireklamo ug usa ang napasakaan na sa kaso.
Samtang gitin-aw ni City Mayor Oscar Moreno nga walay sagol pamulitika ang pagpang-apod apod sa ikaduhang hugna sa relief goods sa dakbayan.
Miingon si Moreno miingon nga kabahin sa makadawat hinabang gikan sa lokal nga kagamhanan ang mga residente sa 26 ka brgy nga miduso kaniya’g petisyon aron ipaubos sa enhanced community quarantine ang syudad gumikan sa nasinatiang Covid-19 pandemic.
Apan gitin-aw ni Moreno nga adunay mga brgy ang dili matagaan sa hinabang ilabina kadtong pakyas nga makaduso sa pipila ka rekisitos nga ilang gipangayo.
Hisayran nga target sa LGU nga mahatagan sa ikaduhang hugna sa relief goods ang 162-mil ka panimalay sa tibook syudad.
