Patay ang 10 ka miyembro sa Dawlah Islamiyah Maute Group nga giingong responsable sa pagpatay sa upat ka sundalo sa Munai, Lanao del Norte, human sa operasyon nga gilunsad sa militar sayong kabuntagon niadtong Abril 17, 2026 sa Lanao del Sur.
Sa interbyu sa Bombo Radyo, namahayag si Col. Jessie Montoya, Deputy Commander sa 103rd Infantry (Haribon) Brigade, nga resulta kini sa intelligence-driven operation nga gihimo sa tropa ubos sa 103rd Infantry Haribon Brigade, 1st Infantry Division, Philippine Army, uban sa suporta sa CIDG ug mga otoridad sa Bangsamoro Autonomous Region in Muslim Mindanao (BARMM).
Lakip sa napamatay ang usa ka senior leader sa grupo.
Matud pa sa militar, direktang nalambigit ang mga indibidwal sa sunod-sunod nga kalapasan, ilabina sa ambush niadtong Enero 23, 2026 sa Munai, Lanao del Norte, nga mikalas sa kinabuhi sa upat ka sundalo samtang usa ang nasamdan.
Walay naitalang casualty sa bahin sa militar atol sa operasyon.
Narekober usab sa tropa ang nagkadaiyang klase sa armas ug mga pampasabog nga gipanag-iya sa mga napamatay nga suspek.
Nasagip usab sa mga sundalo ang usa ka masuso sa lugar sa engkwentro ug gilayon kining gihatagan og medikal nga pag-atiman.
