(Update) CAGAYAN DE ORO CITY – Nagtoo ang liderato sa 4ID,Philippine Army nga mosaka pa ang ihap sa mga namatay’ng rebeldeng New People’s Army o NPA nga gika-engkuentro sa tropa sa 403rd Infantry Brigade sa bukirang sakop sa Malaybalay City,Bukidnon sa miaging kadlawon sa pagsaulog sa pasko.
Kini human kompirmaha ni 4ID commander Major Gen Jose Maria Cuerpo nga dugang patay’ng lawas sa rebelde ang narekober sa tropa nga mihimo sa clearing operation sa encounter site kagahapong adlawa.
Miingon si Cuerpo nga mitala na sa napulo ka NPA combatants ang kompirmadong namatay nunot sa aerial ug ground assaults nga gikasa nila mismo sa kasaulugan sa pasko.
Nabawian pa sa halos napulo usab ka tag-as nga kalibre sa mga armas ang mga rebelde kinsa magsaulog unta sa ilang ika-55 ka tuig nga anibersaryo sa katukuran sa Communist Party of the Philippines kagahapong adlawa.
Samtang wala panumbalinga sa 4ID ang mga mi-kuwestiyon kon nganong mihimo’g pag-atake ang ilang tropa taliwala nga mitanyag sa duha ka adlaw nga unilateral ceasefire ang CPP-NPA sa nasudnong gobierno.
Nunot kini sa kamatayon sa napulo ka NPA rebels nga naipit sa aerial ug ground assault nga gikasa sa 403rd IB,Philippine Army sa Malaybalay City,Bukidnon sa miaging Disyembre 25 sa kadlawon.
Namahayag siCuerpo nga walay mando gikan sa Camp Aguinaldo aron mohimo sila’g stand down sa ilang puwersa hinungdang nasapon nila ang bana-banang 50 ka sakop sa mga rebelde.
Walay gipatuman ang gobierno nga ceasefire ngadto sa CPP-NPA-NDFP rason nga aktibo ang opensibang-militar batok kanila.
Dugtong niini,hatagan sa plastar nga paghatag sa katapusang pahulayan sa gobierno ang napulo ka patay’ng lawas sa mga rebeldeng NPA nga tipik sa nakig-engkuwentro sa kasundaluhan.
Miingon si 403rd IB commander Brig Gen Michelle Anayron nga may koordinasyon na sila sa local govt units sa Bukidnon kuyog ang PNP alang sa pag-proseso sa mga namatay’ng rebelde ayha malubong ning semanaha.
Apan gilayong ihatag usab sa gobierno ang mga lawas sa maong mga rebelde kon dunay mga pamilya nga mo-claim sa oras nga hingpit nang makanaug ang mga sundalo nga nagdala niini padulong sa city govt sa Malaybalay.
Hisayrang maoy nasangka sa ilang puwera ang mga sakop sa Sub-Regional Committee 2 Headquarters Loader ug Regional Sentro De Gravidad Compaq nga ubos North Central Mindanao Regional Committee sa syudad sa Malaybalay,Bukidnon sa miaging kadlawon.
