CAGAYAN DE ORO CITY – Mi-apelar sa tabang-pinansyal si Jasaan Mayor Redentor Jardin alang sa mga pamilya nga apektado sa pagkasunog sa napulo ka balay sa Purok Kilowang nga nahimutang sa utlanang bahin sa mga brgy sa Luz Banzon ug Kimaya sa iyang lungsod.
Kini aron makadugang nga magamit sa pagtukod balik sa mga puy-anan nga nalamoy sa kalayo sa maong lugar.
Miingon si Jardin nga hinoon walay kinabuhi nga naangol o nakalas sa hitabo.
Sulti usab ni BFP Jasaan Station commander SFO4 Antonino Salugsugan nga giimbestigaran pa nila ang teorya nga nagsugod sa kusina nga bahin sa balay nga gipanag-iya ni Cedric Calibay.
Mitala sa bana-bana nga 200-mil pesos ang structural damage sa maong sunog kagahapon sa udto.
