CAGAYAN DE ORO CITY – Nadakpan sa hiniusang operasyon sa Philippine Drug Enforcement Agency 10 ug Cagayan de Oro City Police Office ang napulo ka suspected drug pushers sa Barangay 17 ning syudad.
Giila ni PDEA 10 regional director Atty Benjamin Gaspi ang prime target suspect nga si Subahani Bayani kinsa gitudlong lider sa shabu distribution sa lugar ug kanhi usab kini person deprived of liberty (PDL).
Siya miingon nga apil usab sa nadakpan sila Dale Yongco;Mark Anthony Virtudazo ug Erwin Oliveros diin sila pasiunang nabawian sa 15 gramos nga gitoohang shabu.
Nadakpan sila sa PDEA-COCPO operatives pinasikad sa gipatuman nga court search warrant operation.
Dugang ni Gaspi nga gisudlan usab nila ang laing lokasyon gamit ang dugang search warrant diin nadakpan sila John Mark Angeles;Anthony Balaba ug Ricky Ampo diin nakompiskar ang 8 gramos sa shabu.
Nakompiskar usab nila ang 12 gramos nga gitoohang shabu sa gilusad nga buy-bust operation gikan kang Joven Allego kinsa nagmintinar sa suspected drug den kuyog ang mga parokyano nga sila Rober Tolibas ug Romeo Madera.
Nasuta nga pulos manag-silingan ang mga dinakpan nga nabawian sa katibuk-ang 35 gramos nga shabu nga dunay balor 238 pesos estimated street value.
Atubangon sa mga dinakpan ang pagsupak sa Dangerous Drugs Act of 2002 sa piskalya ning syudad.
