CAGAYAN DE ORO CITY – Nakagawas na ang 147 ka pasyente sa pagkahilo kay mikaon sa putahe nga bam-i,balot ug adobong manok gikan sa pagtambong kasal sa Sitio Calapat,Brgy Tagbak sa Bukidnon.
Kini ang kompirmasyon ni Talakag Municipal Health Office head Dr. Mark Anthony Dano nunot sa nahitabong ‘mild food poisoning’ sa ilang 35 ka residente ug laing sobra 100 gikan sa lungsod sa Lantapan sa susamang probinsya.
Siya namahayag nga unang nakasinati sa pagpanakit sa tiyan,pagsuka ug paggawas sa hugaw ang mga biktima hinungdan nga paspas gipahiling sa nagkadaiyang ospital sa probinsya.
Nasuta nga sobra 15 oras na ang pagkaon nga gipangkonsumo sa mga biktima nga dala nila gikan pagtambong sa kasal.
Una nang gihimo ang kasal sa Sitio Calapat diin nagpuyo ang babaye samtang nagdala usab sa daghang pagkaon ang panig sa lalaki nga maoy gisaw-an sa paniudto sa miaging Sabado petsa 18 ning bulana.
