CAGAYAN DE ORO CITY – Mag-atubang sa kasong pagsupak sa anti-carnapping law ang upat ka suspek nga nadakpan sa hiniusang operasyon sa kapolisan sa checkpoint sa Matimus,Kapatagan,Lanao del Norte.
Kini human unang gi-alarma ngadto sa Kapatagan Municipal Police Station ug 2nd Mobile Force Company sa Lanao del Norte Police Provincial Office ang sunod-sunod nga kasong pagpangawat sa motorsiklo ug mga bao-bao sa pipila ka lungsod sa lalawigan.
Nadakpan ang mga suspek nga sila alyas Ailyn,18 anyos; Aya,19 anyos; Romel,35 anyos ug Onel,41 anyos nga naggikan sa mga syudad sa Pagadian ug Dipolog sa Zamboanga Peninsula.
Gibutyag ni Police Regional Office 10 Director Brig Gen Jaysen De Guzman nga nabawi gikan sa mga dinakpan ang 11 ka kinawat nga motorsiklo ug lima ka bao-bao nga dad-on unta sa laing rehiyon.
Saysay sa mga dinakpan nga ang ilang gakakuha nga mga kinawat ang ibaligya lang nila’g barato ngadto sa ilang nakasabot nga buyers.
