CAGAYAN DE ORO CITY – Samaron ang 11 ka mga pasaherong Davaoeño human maangol sa nahulog sa gisakyang jeep sa Barangay Palacapao,Quezon, Bukidnon.
Segun sa imbestigador sa Quezon Municipal Police station nga lakip sa mga samdan ang unom ka mga bata ug menor de edad nga dinaliang gidala sa balaytambalanan.
Matud pa ni PO1 Patrick Baring, papauli na unta padulong Compostela Valley ang mga pasahero gikan sa ilang re-union sa Misamis Occidental.
Inay mudiretso’g uli, mihapit una ang mga nag re-union sa Overview Cultural Park.
Kini maoy hinungdan nga nahulog ang jeep sa pangpang nga dunay gilawomon 50 metros tungod sa katungason sa dalan padulong sa parke.
Gibutyag sa rescuers, pulos mga samad sa ulo ug bun-og sa lawas ang nahiagom sa mga biktima.
Sa pagkakaron, wala laraw nga magpasaka ug kaso ang mga pasahero ilabina nga sila ra mismo ang misugo sa drayber nga muhapit sa maong sa parke.
