Paslak na sa prisohan Manila Police District ang mukabat 113 ka indibidwal human milanding sa riot ang lihok-protesta sa Mendiola, Ayala Bridge, ug Recto, kagahapon.
Sa maong ihap, nasikop ang 65 ka mga hamtong ug 48 ang mga menor de edad nga iturn-over sa Reception Action Center sa Municipal Social Welfare and Development Office alang sa ipahigayon nga psycho-social intervention.
Subay sa breakdowm MPD, 51 ang nadakpan sa Ayala Bridge, 21 sa Mendiola, ug 41 sa Recto.
Gimonitor sa MPD ang mga nadakpan samtang gipaubos sila sa medical tests aron masuta kung adunay mga samad o kadaot nga nahiaguman.
Posibleng mag-atubang sa daghang kaso ang mga nasikop sama paglapas sa Batas Pambansa 880 (Public Assembly Act), illegal assembly, resistance and disobedience to authority, arson, direct assault, ug serious physical injuries.
Gitutukan usab sa imbestigasyon ang posibleng impluwensya sa usa ka lokal nga rapper ug ang papel sa mga hiphop gangsters, samtang giimbestigaran ang mga posibleng funders nga nagpaluyo sa kalihukan.
