Miabot na sa 120 ang inisyal nga ihap sa kaso sa suka-kalibang o Acute Gastroenterities (AGE) ang natala sa Cagayan de Oro City Health Office (CHO), nga nagpahiling sulod sa managlahing hospotal sa syudad.
Kini ang tubag ni Dr Rachel Dilla, ang hepe sa CHO sa interbyu sa Bombo Radyo. Miingon si Dilla nga wala pay labot sa maong ihap ang kapin 150 ka mga outpatient nga nakasinati sa susamang mga balatian sa milabay nga semana.
Una niini, gihupay ni Dr Dilla ang report nga aduna nay outbreak sa waterborne diseases sa syudad, tungod sa kontaminado nga tubig.
Gitataw ni Dilla nga ang Epidemiology Bureau sa Department of Health ang nag-inusarang ahensya nga makadeklarar sa outbreak sa usa ka lugar.
Sa pagkakaron, padayong nangulekta sa sampol sa tubig sa mga natumbok nga kan-anan sa mga reklamante ang ilang team, lakip ang tubig gikan sa Cagayan de Oro Water District (COWD).
