CAGAYAN DE ORO CITY – Gidepensa sa amahan ang paglugos niini sa iyang kaugalingong anak babaye diha sa Brgy Agusan ning syudad.
Kini human unang nagpatabang ang wala hingangli nga biktima sa kapolisan kay dili na maantos ang pagbinaboy sa suspek niya nga amahan nga si Gilbert Llanora sa taas nga panahon.
Miingon si Llanora nga kanunay niya makit-an nga maligo ang iyang anak diin giingong mawala kini sa huna-huna rason nga mahitabo ang pagpanglugos.
Anaa sa 50 ka higayon nang gibalik-balika’g lugos sa suspek ang biktima sukad pa kini nag-edad sa 8 ug hangtod 13 anyos ning tuiga.
Si Llanora ang bag-uhay pang nasulod sa intelligence group nga nakabase ning syudad.
Una nang gibutyag ni Puerto Police Station commander Capt Mario Mantala Jr nga kasuhan nila sa multiple rape ang suspek ugmang adlawa.
Nasayran nga bulag sa asawa ang suspek ug atua sa abroad hinungdan nga kanunay makalugar paghimo sa linu-og nga binuhatan ngadto sa iyang anak.
