CAGAYAN DE ORO CITY – Samaran ang 13 ka indibidwal human gibanggaan sa usa ka wing van ang ilang panimalay sa Sitio Balaon, San Isidro, Talakag Bukidnon kaganihang buntag.
Gibutyag ni Talakag Investigator Staff Sgt. Neil Galve, nawad-an ug preno ang drayber nga si Cesar Sunto Jr. hinungdan nga gigamba niini ngadto sa tumbok nga yuta.
Apan sa wala damha, nipaingon kini sa balay ni Roderico Sayatao.
Dugang niini, 80 porsyento sa balay ang naguba sa maong insidente.
Lakip sa mga samaran ang 7 ka menor de edad.
Hinoon, nasa luwas na nga kahimtang ang mga naangol apan gikataho nga 3 niini ang i-refer sa usa ka ospital dinhe sa Cagayan de Oro.
Sa pagkakaron, nasa kustodiya na sa kapulisan ang nasampit nga drayber ug mag-atubang sa kaso nga reckless imprudence resulting to multiple physical injuries.
