Paslak na sa prisohan ang 19 anyos nga lalaki human iyang gi-unay sa paglugos ang iyang 14 anyos nga ig-agaw sa Barangay Sil-ipon, Libona, Bukidnon.
Giila sa Police Regional Office-10 PBGEN Rolindo Suguilon ang suspek nga si alya Mar-mar, walay trabaho ug residente sa maong lugar.
Gitumbok sa kapulisan ang suspek isip Top 8 Most Wanted Person, human siya pasakahe sa statutory rape.
Unang namahayag ang biktima nga nahitabo ang pagpanglugos sa balay sa suspek niadtong Agusto 2024, sulod sa ikatolong higayon samtang kini hubog nga mipauli sa iyang puy-ang.
Mitug-an ang biktima nga wala siya makasumbong dayon sa kapulisan kay gibaharan siyang patyon sa suspek.
Ulahi na nasayran sa mga ginikanan sa biktima nga gilugos ang ilang anak dihang kini nakompirmar nga nagmabdos sa anak sa iyang ig-agaw.
Sa pagkutlo ning balita, ang suspek gikustodiya na sa Manolo Fortich Municipal Police Station alang sa hustong proseso.
