CAGAYAN DE ORO CITY-Apektado ang 14 brgy sa nagpadayon nga engkwentro sa Armed Forces of the Philippines batok sa nabilin nga Maute-ISIS group sa Tubaran ug Pagayawan Lanao del Sur.
Sa maong ihap, walo ka brgy sa Tubaran ang apektado nga gilakipan sa Wago, Guiarong Tubaran, Malaganding, Tubaran Proper, Madaya, Gaput, Dinaigan ug Alog samtang unom sa Pagayawan nga gilangkuban sa Padas, Guiarong Pagayawan, Linindingan, Diampaca, Bangon, ug Madang.
Matud ni Joint Task Group Ranao deputy commander Col. Romeo Brawner nga posibleng madugangan pa ang ihap sa mga bakwit ilabina nga nagpadayon pa ang ilang airstrike batok sa grupo ni sub-commander Humam Abdul Romato Najid, alias Abu Dar.
Una nang giangkon ni Col.Brawner nga niadto pang panahon sa Barangay ug SK elections ilang nahibal-an ang presensya ni Abu Dar sa Tubaran human gipatay niini ang usa ka kandidato sa miaging piliay.
Gikompirmar usab ni Brawner nga mga batan-on gihapon ang target sa mga Maute-ISIS nga e-recruit.
Siya miingon nga giilad sa mga terorista ang mga batan-on nga mosulod sa training pagka-pulis ug sundalo hinungdan nga daghan ang mokuyog sa ilang grupo.
Gibutyag usab niini nga daghang pondo nga kwarta ang Maute-ISIS tungod sa ilang mga kinawat sa Marawi City samtang nagdawat usab sila’g suporta gikan sa abroad ingon man sa mga Abu Sayaff group.
Una nang gibutyag ni Brawner nga si Abu Dar na lamang ang nahabilin nga original Maute-ISIS group nga mi-atake sa tropa sa gobyerno tungod kay nakasibat kini sa Marawi City niadtong Mayo 23 hangtud Oktubre 23, 2017.
Samtang gitin-aw ni Lanao del Sur Board Member Abdulhamid Amerbitor nga gihatagan na’g ayuda sa lokal nga kagamhanan ang mga bakwit nga apektado sa maong engkwentro.
Si Amerbitor miingon nga sukad nahitabo ang engkwentro, gilayon nga gitunula’g hinabang sa mga opisyal ang kapin libo ka bakwit.
Nanawagan si Amerbitor og pag-ampo alang sa kaluwasan sa tanan.
Temporaryong gipanghikling sa mga tunghaan ug covered court ang mga apektadong residente.
Sumala ni Tubaran Municipal Social Welfare Development Casa Mela Tidig nga anaa na sa 769 ka IDPs o 312 ka pamilya ang ilang gihataga’g ayuda human maapektuhan sa kagubot.
Nagtoo si Tidig nga kon ugaling dili pa matapos ang bakbakan, posibleng madugangan pa ang ihap sa IDPs.
Una nang gimando ni Gov Bedjoria Soraya Alonto Adiong sa local disaster officials nga ihatag ang mga panginahanglanon sa mga bakwit.
