CAGAYAN DE ORO CITY – Walay nasinatian nga dagkong kadaot ang mga tag-as nga gambalay sa intensity 4 nga linog nga subling miigo sa syudad.
Kini human gitay-og sa 6.5 magnitude nga linog sa laing higayon ang lungsod sa Tulunan,North Cotabato nga naka-apektar sa dakong bahin sa Northern Mindanao ilabina sa Cagayan de Oro City kagahapon sa buntag.
Miingon si CDRMMD head Nick Jabagat nga gilayong mihimo sila’g pakisusi sa commercial establishments ug govt buildings pagkahuman sa maong linog.Nasuta nila nga wala makahatag sa kadaot ang maong linog sa kanhi na nangliki nga porsyon sa mga gambalay sa syudad.
Hinoon,subli nakapanggawas ang mga empleyado sa Centrio Ayala Mall ilabina ang Teleperformance call center tungod sa kahadlok sa mga empleyado sa linog kagahapon sa buntag.
Sa pinakaulahing data sa National Disaster Risk Reduction and Management Council,anaa na sa 14 ka tawo ang patay samtang 403 ang samaron ug laing duha missing tungod sa sunod-sunod nga linog sa Mindanao ning semanaha lamang.
Dugang sa NDRRMC,14 niini sa mga naangol ang gikan dinhi sa Northern Mindanao ilabina sa syudad.
