CAGAYAN DE ORO CITY – Gitunulan sa pasiunang tabang-pinansyal ug ubang batakang panginahanglan ang 14 ka sakop sa Militia ng Bayan o MB nga maoy nagsilbing dalunggan ug mata sa CPP-NPA-NDF sa matag-lusad sa operasyon sa militar sa mga bukiran sa Bukidnon.
Kini human nakumbensir ang maong mga CPP-NPA supporters nga talikdan ang hiwi nga idolohiya nga gitisok kanila aron batukan ang kagamhanan.
Mismo si PR0 10 Director Brig Gen Benjamin Acorda Jr kuyog ang NICA 10,AFP ug ubang govt agencies ang mi-presentar sa maong MB surrenderees atubangan sa media sa Camp Alagar kagahapon sa hapon.
Miingon si Acorda nga tungod sa hiniusang paningkamot,milampos ang kagamhanan nga luwason ang MB members nga naggikan sa Malaybalay City,Maramag,Valencia City ug Quezon sa Bukidnon.
Samtang dako ang pagpasalamat sa mga kanhi lumilihok sa CPP-NPA-NDF nga naluwas pa ang ilang kinabuhi ug nakabalik sa sabakan sa balaod gikan sa ilang dugay’ng katuigan nga pakig-away sa gobierno.
Kini bisan kon dili sila combatants apan nagbaton gihapon sila sa delikadong tahas pinaagi sa pagsumbong sa ilang mga masaksihan nga kalihukan sa militar ngadto sa mga kadagkuan sa CPP-NPA.
Miingon ang kanhi militian ng bayan member nga dako ang ilang pagbasol nga nagpailad sa tam-is nga mga pulong sa nag-recruit kanila hinungdang wala na nila usiki ang higayon nga mobalik sa kagamhanan.
Gitakda usab sila tabangan sa sa ubang ahensiya sa gobierno aron dili na subli madala sa pagpang-recruit sa mga komunista.
