CAGAYAN DE ORO CITY – Init nga gidawat sa 8th Infantry Battalion ang dul-ag 15 ka mga miyembro sa New Peoples Army (NPA) nga mitahan sa ilang kampo sa kagahapon sa buntag.
Unang milusad sa ‘peace dialogue’ ang Local Government Officials, mga Tribal elders ug kasundaluan aron hapsay ang pagtahan sa mga rebelde nga napul-an na sa kinabuhing rebolusyonaryo nga gipagakus kanila ni CPP-NPA-NDFP founder Jose Maria Sison.
Pulos nagsumikad sa Sub-Regional Committee 2, North Central Mindanao Regional Command ang mitahan bitbit ang ilang tag-as nga kalibre sa armas ug mga granada.
Mi-angkon ang mga rebel returnees nga sila ang responsable sa pagpanghasi sa mga residente sa Barangay Canangaan, Cabanglasan, Bukidnon.
Gipasalamanatan ni Cabanglasan Municipal Mayor Reynante Inocando, ang kasundaluan ug ang komonidad sa pagtinabangay aron maproteksyon ang kahusay ug kalinaw sa ilang lugar.
Mapasalamaton sab ang mayor sa mga sakop sa NPA nga mitahan ug mi-awhag sa ilang mga kauban nga mubalik na sabakan sa gobyerno aron mahatagan sa malinawon nga pagpuyo, desente nga balay ug trabaho ubos sa Enhanced Comprehensive and Local Integration Program kon E-CLIP sa Administrasyong Duterte.
Una niini, nag-isyu sa Resolution no. 09 series of 2019 ang munisipyo sa Cabanglasan nga itratar isip persona-non-grata ang tanan miyembro ug sympathizer sa walhong pundok.
Namahayag si 1st Lt. Kenneth Cabbigat, Civil Military Officer sa 8IB, nga dili lang distroso sa normal nga panginabuhian sa tawo ang dala sa mga rebelde apan, pagdagmal sa kinaiyahan sama sa ilegal nga pagsunog sa mga kahoy, ug mga plantasyon sa saging sa Bukidnon, gumikan kay wala sila nahatagan sa revolutionary taxes nga ilang gisingil sa pipila ka mga kompanya nga ilang gikilkilan nga nakabase sa probinsya.
