CAGAYAN DE ORO CITY – Nasudlan sa giingong dautang espirito ang 14 ka magtutungha sa Initiao Comprehensive High School sa lungsod sa Initao,Misamis Oriental kagahapon sa hapon.
Namahayag si convent boy nga si Elmie Waslo nga duha sa 14 ka bata ang na-grabehan diin kanunay isulti sa mga nasudlan nga gilugos kini sa ilang amahan ug gipatay daghan na ka tuig ang nakalabay.
Gikompirmar ni Waslo nga nadala sa St Francis Xavier Church ang mga tinun-an ug gi-ampuan.Una niini, gisuspenso ang klase tungod sa hitabo.
Miingon si Waslo nga posibleng nasuko ang dautang ispiritu sa pagbisita sa blood relic ni St John Paul II sa simbahan sa milabay’ng Miyerkules.
Namahayag usab si Roel Acapag, amahan sa usa sa nasudlan nga si alyas Lalay nga lahi ang bersyon sa ispirito nga misulod sa iyang lawas.
Nakita ni Acapag ang puno sa kaisog, kasuko ug gustong mangayog hustisya ang ispirito nga misulod sa lawas sa iyang anak.
Base sa gipaninggit sa iyang anak, tulo ka lalaki ang milugos ug mipatay kaniya kuyog ang iyang anak.
Namugos si Acapag nga kapila na sila nakasaksi sa maong hitabo.
Kini tungod kay sa miaging tuig,duna na usab mga bata sulod sa Initao Comprehensive Highschool ang nabiktima sa dautang ispirito nga nagpuyo sa school library ug gipatubo nga kawayan sulod sa maong tunghaan.
