CAGAYAN DE ORO CITY – Gipasalig sa organizers sa Ms Cagayan de Oro nga mahimong mas kulbahinam ang paglusad nila niini dinhi sa syudad sulod ning tuiga.
Kini human gihimo nila nga kinse ka kandidata ang mag-ilogay sa korona alang sa Ms CdeO.
Gipaila-ila ang maong mga kandidata atubangan sa mga bisita ug prensa sa Ayala Centrio Mall ning syudad kagahapong adlawa.
Gibutyag ni Ms Mags Cue,overall event organizer nga angayang hulatan na sa Kagay-anons ang mahimong pre-pageant activities sa mga kandidata kay manganhi ang mga sikat nga beauty enthuasiasts sa kauluhan dinhi sa dakbayan.
Kini ang pagbalik sa face-to-face nga coronation night sa maong indigay sukad naigo sa pandemya sa COVID-19 ang dakbayan sa tuig 2019.
Kabahin sa magtigi sa 2022 Ms CdeO crown ang mga kandidata nga sila Kyleah Donaldson;Chaoncy Rich Azucena;Shirley Galupo;Blanche Nicole Villaruz;Arianne Galenzoga; Luisa Merrey Bingtan;Andrea Mae Brito;April Angelu Barro;Carla Mae Casinabe;Nicole Ramos;Julia Alessandra Bayang;Lesley Anne Patricio;Anna Marie Rebucas;Cris Antonet Teaño ug Lyle Justin Laid.
Hisayrang pipila sa mga kandidata ang comeback na samtang ang uban,igsoon sa pipila ka nahimong Ms CdeO sa miaging tuigan.
