(Update) CAGAYAN DE ORO CITY – Misaka pa sa 15 ang namatay ka miembro sa New Peoples Army o NPA sa engkwentro sa Sitio Likudon, Brgy Kamanikan, Gingoog City,Misamis Oriental.
Kini ang gikompirmar ni 4th ID Philippine Army spokesperson Capt. Al Anthony Pueblas.
Gibutyag ni Pueblas nga narekoreber na ang napulo niini samtang padayon pang gihimo ang retrival operation sa laing lima.
Gawas sa mga patay’ng lawas, narekober usab sa crime scene ang duha ka M16, M14, AK47, usa ka carbine ug landmines.
Nasuta nga ang maong mga miembro sa Guerilla Front 4-A ang naglihok sa Caraga Region diin nabantayan sa katawhan hinungdan gilusob sa militar sa miaging kadlawon.
Samtang nagtoo ang militar nga laraw isabotahe sa rebeldeng New People’s Army o NPA ang pagpanghatag unta sa SAP cash assistance sa DSWD rason nga nangabot kini sa Gingoog City.
Kini human unang gi-report sa katawhan ang presensiya sa mga rebelde nga gikan sa Caraga Region sa miaging kadlawon.
Gibutyag ni 402nd Brigade civic military officer Major Francisco Gallero nga halos mag-usa ka adlaw ang engkuwentro batok sa mga rebelde hinungdan nga daghan ang namatay sa mga kaaway.
Gipamugos usab niini nga walay bisan usa ka sundalo ang samaron o namatay sa maong engkuwentro.
Una nang gianunsyo ni Pres Rodrigo Duterte nga mohatag siya’g P2 milyon nga premyo sa makapatay sa lider sa mga rebelde.
