CAGAYAN DE ORO CITY – Gikasuhan sa kapolisan ang 15 ka sakop sa rebeldeng New Peoples Army o NPA diha sa Valencia City,Bukidnon.
Kini may kalabutan sa pagpusil-patay kang CAFGU member Pedro Omblero Jr, hingkod ang panuigon, residente sa Purok 9, Vintar, Valencia City ug na-assign sa 88th IB PA sa Lumbayao Patrol Base.
Giila ni Valencia City Police director Lt Col Surki Serenias ang gikasuhan nga sila si Reynante Tumbalang alas War; Dionisio Micabala alyas Muling; Abelardo Navarro alyas Canoy; Julia Cagadas alyas Toyang; Bonifacio Lutawan alyas Budo; Lorna Micabalo alyas Ating; Allan Morales alyas Budlat; Judith Jaron alyas Geelah; Precy Locsin alyas Jian; Michael Fat alyas AS; Pedro Lumantas alyas Andoy; Alyas Mosong; Beverly Sinunta alyas Toyang; Alyas Jian ug Alyas Pon.
Gipasaka sa kapolisan batok sa mga suspek ang murder, robbery, carnapping ug pagsupak sa International Humanitarian Law o IHL.
Kahinumduman nga gipatay si Omblero mismo atubangan sa iyang kapikas sa Batangan sa maong syudad niadtong Oktubre ning tuiga.
