CAGAYAN DE ORO CITY, Philippines – Misaka pa sa 15 ka tawo ang patay tungod sa Bagyong Enteng.
Kumpirmasyon kini sa Office of the Civil Defense (OCD) sa command conference nga gipatawag ni Presidente Ferdinand Bongbong Marcos, sa Kampo Aguinaldo, Quezon City, kagahapong adlawa.
Gireport ni OCD Director of Operations Service Cesar Idio, nga laing 15 ka tawo ang natala nga samaran ug 21 ang padayong gipangita.
Subay sa nahipos nga impormasyon sa National Disaster Risk Reduction and Management Council (NDRRMC) 547,029 ka indibidwal gikan sa 695 barangays ang apektado sa bagyo ug ulan nga dala sa Southwest Monsoon (Habagat).
Sa labing lab-an nga situational report sa ahensya, 288,110 residente ang nabahaan sa Central Luzon; 181,506 sa Bicol Region; ug 74,030 sa National Capital Region (NCR).
Padayong nagpasilong sa 323 evacuation centers ang 50,076 indibidual o 12,742 pamilya.
Samtang 14,164 katawo kon 4,836 pamilya ang mas gipili nga mubakwit sa mga temporary shelters.
Duha na ka lugar ang nagdeklarar sa State of Calamity. Una, ang Naga City, Camarines Sur, ug misegunda ang Allen, Northern Samar, nga mitala sa pinakadaghang patay.
Ang Department of Agriculture namahayag nga gibana-bana P351-Milyon ang damyos nga gibilin sa duha ka kalamidad sa sektor sa agrikultura.
Misumada sa 13,623 ka mga mag-uuma ang apektado sa pagkabanlas sa ilang 14,814 metriko tonelada sa 8,893 ektarya sa kahumayan, mais, ug ubang pang high valued crops.
Una niini, gipanigurado sa Department of Social Welfare and Development nga mahatdan sa family food packs ang mga apektado sa baha.
Sa pagkutlo ning balita, gibutyag ni DSWD Sec Rex Gatchalian nga gideploy na sa ilang ahensya ang 133,000, gikan sa tolo ka mga rehiyon nga gilampurnas sa Bagyong Enteng.
Si Presidente Marcos namahayag nga dili niya gustong masubli ang nahitabo sa Bagyong Yolanda, o Ondoy nga mikutlo sa daghang kinabuhi taliwala nga hinay ra ang gibundak nga ulan.
Sunod nga gipangandaman ni Marcos ang ikaduhang bagyo nga musulod sa Philippine Area of Responsibility sunod semana, segun sa weather forecast sa state weather bureau.
Nakagawas na sa PAR ang bagyo ug sunod nga rumbo niini ang nasud sa China.
