Naa na sa kustodiya sa Philippine Coast Guard (PCG) ang 15 ka Pilipinong survivor ug ang lawas sa namatay nga 2 crew members sa M/V Devon Bay human gihatag sa Chinese Coast Guard (CCG).
Namahayag ang PCG nga nakuha ang mga tripolante crew human sa gihimong turnover operation tali sa PCG ug CCG nga nahimutang 168 nautical miles kasadpang bahin sa Tambobong, Pangasinan.
Dugang pa sa PCG nga, nabalhin ang mga pinoy pinaagi sa rigid-hull inflatable boats tungod sa kadako sa mga balod nga dili makadikit ang duha ka barko.
Samtang nakig-koordinar na usab ang PCG sa pamilya sa duha nga namatay aron mahatagan ug husto nga lubong.
Sa pagkakaron, sakay sa BRP Teresa Magbanua (MRRV-9701) ang 17 ka crew members nga gilauman nga moabot sa Pier 13 sa Port Area sa Manila, Lunes sa buntag.
Samtang gisiguro usab sa PCG nga nagpadayon gihapon ang ginahimong search and rescue operation alang sa upat pa ka crew members nga missing.
Ulahing napalgan ang mga tripolante sa kadagatang sakop Pangasinan ug laraw unta mudunggo sa Guangdong China dala ang ilang produktong iron ore.
