PC:(Sunstar-CdeO)
CAGAYAN DE ORO CITY-Gipalayas sa 150 ka miembro sa tribung Tagtabulon ang presensiya sa militar nga nagtukod kampo sa Sitio Minkamansi,Brgy Banglay,Lagonglong,Misamis Oriental.
Kini aron manguli na sila’g balik sa ilang mga pinuy-anan gikan sa pagbakwit diha sa provincial capitol grounds ning syudad.
Miingon si Tagtabulon tribe spokesperson Sariza Acosta nga mahadlok sila maipit kon subli mag-engkuwentro ang militar ug rebeldeng New People’s Army sama niadtong Mayo 27 ning tuiga.
Samtang gikakurat sa provincial govt ang kalit paglugsong sa 35 ka pamilya o 150 ka indibidwal padulong sa capitol grounds gikan sa Lagonglong,Misamis Oriental.
Kini bisan nga wala magkulang ang munisipyo ug probinsya paghatag ayuda kanila samtang nangbakwit ug nagpasilong sa maong lungsod sa miaging semana.
Miingon si PDRRMO head Fernando Dy Jr nga kini ang hinungdan nga gilayong nagpatawag sa emergency meeting sa department heads aron hisgutan ang mga bakwit.
Kini na ang ikaupat nga tuig sugod 2015 nga nangbakwit padulong kapitolyo ang maong mga lumad kon mag-engkuwentro ang militar ug NPA rebels sa Lagonglong ning lalawigan.
Samtang ipatilaw sa militar sa kalambuan gikan sa serbisyo sa gobierno ang katawhan sa Sitio Minkamansi,Brgy Banglay,Lagonglong,Misamis Oriental.
Kini ang hinungdan nga dili mohawa ang kasundaluhan ug ipatindog ang ilang kampo aron mapalayas ang rebeldeng New People’s Army o NPA sa maong lungsod.
Kini ang baruganan ni 58th IB,Philippine Army commander Lt Col Roy Anthony Derilo sukwahi sa propaganda sa pipila ka pamilyang lumad nga temporaryong nagpasilong sa provincial capitol park ning syudad.
Sa engkuwentro,duha ka NPA rebels ang napatay samtang usa ka sundalo ang samaron sa maong lungsod sa miaging semana.
