Mas gihatagan pa ug katin-awan ni kanhi Supreme Court Associate Justice Adolfo Azcuna ang giingong 2/3 nga boto para sa desisyon sa impeachment trial ni Vice President Sara Duterte sa Senado.
Subay sa gipahayag sa legal analyst nga si Atty. Angel Lim, nitugpa ug mibarog sa tinuod nga kahulogan sa Batakang Balaod ang mga tubag ni Azcuna.
Nagpabilin nga 16 ka boto gayod gikan sa 24 ka sakop sa Senado ang kinahanglanon. Dili kini pwedeng pakubsan sa 15 lang tungod sa mga wala nakatambong nga mga senador sa hearing.
Gipasabot ni Lim nga gidala ni Azcuna ang lagda nga Plain Meaning Rule o Verba Legis nga nagpasabot nga sundon ra gyod kung unsa ang nakasulat sa Saligang Balaod, nga 2/3 sa tanang sakop sa Senado, ug dili pwedeng bag-ohon ang kuwenta.
Tungod niini, giinsister sa abogado nga sundon lang kung unsa ang gipahayag sa balaod ug dili na kini dungagan ug uban pang interpretasyon aron magpabilin ang hustisya.
