CAGAYAN DE ORO CITY – Gikihay na ang kasong paglapas sa Dangerous Drugs Act 2002 o Republic Act 9165 batok sa duha ka motorista nga nagdala sa gitoohang shabu ug nasapon sa checkpoint sa Sultan Naga Demaporo,Lanao del Norte kaganina sa kadlawon.
Nakompiskar sa mga otoridad ang 17 ka pakete sa shabu gikan sa maong mga suspek.
Segun ni Police Captain Corcini Morales, hepe sa Sultan Naga Dimaporo Police Station nga gipara nila ang duha ka suspek nga sila Jeltroy Monteros Subrabas, 25 anyos, minyo ug molopyo sa Purok 3, Poblacion, Tubod, Lanao del Norte ug si Ramel Nacario Caballes, 33 anyos, usa ka machine mechanic ug taga Brgy. Pinuyak, Lala, Lanao del Norte.
Nakuha sa u-box ni Caballes ug Subrabas ang 17 ka sachets nga gibutang sa mga u-box sa ilang mga motorsiklo.
Lakip gikompiskar sa mga otoridad ang duha ka mga motor nga walay mga plaka nga iya sa mga nasikop nga mga motorista.
Gisaksihan ang pagsanta sa duha ka drug pushers nila Brgy. Councilor Mohammad Ashraf Panda ug DOJ representative nga si Mr. Herbert Bohol.
