CAGAYAN DE ORO CITY-Naangol ang 18 ka pasahero human gibanggaan sa dump truck ang usa ka passenger van sa Upper Puerto, San Isidro, Brgy. Alae, Manolo Fortich Bukidnon.
Matud ni SP01 Rodrigo Villasan, traffic investigator sa Puerto Police Station nga nakaangko’g samad ingon man bun-og sa kalawasan ang mga biktima tungod sa kusog nga impact.
Base sa report, miliko ang dumptrak nga gimaneho ni Godofredo Celebrar aron magpatubil apan kalit lamang kini nga gibanggaan sa van nga padulong sa Cagayan de Oro.
Samtang hulaton sa laing imbestigador sa Puerto Police Station nga makaggawas sa ospital ang naangol nga drayber sa passenger van sa panagbangga.
Sumala ni P02 Eldie Lumantas, traffic investigator gihapon sa Puerto Police Station nga iya nang nakuhaa’g pahayag ang drayber sa trak nga si Godofredo Celebrar ug maoy sunod niya nga ipaubos sa imbestigasyon ang drayber sa van nga si Rosauro Burdeus, taga Brgy Agusan ning syudad.
Tumong niini nga mahibal-an kung kinsa ang angayang manubag sa nahitabong aksidente.
