CAGAYAN DE ORO CITY – Nagpaubos karon sa home quarantine ang 18 ka municipal mayors nga gikan sa lain-laing lungsod sa Bukidnon.
Kini human sila ang ulahi nga gikauban ni Sen Jose Miguez Zubiri samtang mitambong sa asembleya sa League of Municipal Mayors of the Philippines o LMP sa kauluhan sa miaging semana.
Miingon si LMP -Bukidnon Chapter President ug Cabanglasan Mayor Renante Inocando nga wala sila magtoo nga magpositibo sa bayrus si Zubiri.
Apan bisan niini,gilayon sila mipaubos sa kuwarantinas aron masiguro nga dili sila makatakod kon magpositibo sa maong balatian.
Samtang gitin-aw ni Northern Mindanao Medical Center o NMMC chief Dr Jose Chan nga dako ang posibilidad nga dili motala sa persons under monitoring ang matag lungsod sa Bukidnon kon ugaling mipaubos gilayon sa home quarantine ang 18 ka mayor nga nakahimamat ni Sen Migz Zubiri sa kauluhan.
Miingon si Chan nga ang home quarantine ang epektibong paagi aron malikayan ang pagkaylap sa maong virus.
Una nang gikampaniya sa Department of Health ang social distancing ug ang kanunay nga pagpanghugas sa kamot aron makalikay sa COVID-19.
