CAGAYAN DE ORO CITY – Nabawi sa hiniusang police operations ang 181 ka kahon sa klase-klaseng sigarilyo nga 4.1 milyon pesos nga excise tax nga kobrahunon unta sa gobierno gikan sa upat ka suspek sa lungsod sa Bonifacio,Misamis Occidental.
Giila ni Misamis Occidental PNP Director Col Danildo Tumanda ang mga dinakpan nga sila si John Mark Trocio,30 anyos,Yandre Gonzales,40 anyos,Noel Cabonilas,42 anyos ug Richard Susi,49 anyos nga pulos giingong mga empleyado sa gobierno ug tanan taga-Pagadian City.
Miingon si Tumanda nga nagpatoo nga mga miembro sa Inter- Agency Task Force apan dihang gisusi sa Bonifacio PNP ug 1002nd Company sa RMFB-10 ang gimaneho nga truck ni Susi,nadiskobre ang mga sigarilyo nga walay tax stamps ug walay nakapatik nga graphic health warnings.
Gitugyan sa PNP sa Bureau of Customs ang maong kontrabando samtang giandam na ang mga kaso nga atubangon sa mga suspek.
