CAGAYAN DE ORO CITY-Gihulat karon sa Security and Exchange Commission o SEC-10 ang pormal nga reklamo batok sa presensiya sa 19-mil ka miembro sa Kabus Padatoon o KAPA Community Ministry International Incorporated nga naglihok sa Bukidnon.
Kini human nakompirma sa SEC -10 nga nagpadayon ang kalihukan sa KAPA bisan sa cease and desist order o CDO nga gipalugwa aron ipahunong ang pangulekta’g salapi isip donasyon gikan sa mga miembro.
Miingon si SEC-10 officer-in- charge Atty Frederick Enopia nga dili sila angay mabasol sa mga miembro kon ugaling dili na mabalik ang ilang gihatag nga salapi sa KAPA.
Giklaro ni Enopia nga ilegal ang gihimo sa grupo ni KAPA founder Joel Apolinario kay nagpatoo sila nga relihiyosong pundok apan sa hilom milambigit sa pagdawat sa donasyon pinaagi sa salapi nga wala malatid sa ilang aplikasyon.
