CAGAYAN DE ORO CITY-Nasikop ang 19 ka tawo sa search warrant operations sa Philippine Drug Enforcement Agency o PDEA 10 sa duha ka drug-den sa Zone 5 Bantilis,Brgy Bugo sa syudad kagabii.
Miingon si PDEA regional director Wilkins Villanueva nga maoy nasikop ang mga target nga sila si Laarni Japitana ug Roel Lanosa alyas Pedro nga dugay nang nagdumala sa drug den sa maong lugar.
Nasikop usab ang laing 17 ka personalidad nga naabtan sa PDEA operatives sulod sa duha ka balay sa mga suspek.
Nabawi gikan sa mga suspek ang balor 148-mil pesos nga gitoohang shabu gikan kang Japitana ug Lanosa.
Samtang namugos ang mga target suspect nga wala sila nalambigit sa pagpayuhot sa ilegal nga droga diha sa Brgy Bugo sa syudad.
Kini bisan nga nakuhaa’g pila ka gramos sa gitoohang shabu sila si Japitana ug Lanosa dihang gisilbi sa PDEA-10 ang search warrants orders gikan kang acting Executive Judge Maria Corazon Llanderal sa mga pinuy-anan nila kagabii.
Miingon si Japitana nga gibutang lamang sa PDEA sa ilang balay ang nakuha nga shabu gikan kaniya rason nga kini nadakpan.
Samtang halos makahilak usab si Lanosa nga nakuhaan kini’g pila ka sachets sa suspected shabu gikan sa iyang posisyon.
Namugos ang suspek nga wala naggikan kaniya ang ilegal nga droga nga nakuha pa sa PDEA operatives sulod sa bag sa iyang igsoon kagabii.
