Misaka pa sa 19,000 ka mga deboto ang natala nga miapil sa nagkadaiyang kalihokan sa Semana Santa sa Camiguin, samtang 13,000 usab ang naitalang entries sa probinsya, sumala ni PRO-10 Spokesperson PMAJ Joan Navarro.
Matud niya, lakip sa maong gidaghanon ang mga nagtambong sa relihiyosong mga aktibidad ug ang mibisita sa mga pilgrimage sites nga maoy sentro sa debosyon sa isla.
Dugang pa niya, ang datos sa pagkakaron padayon pang gikonsolida uban sa ubang lugar sa Northern Mindanao tungod sa nagkadaiyang destinasyon sa mga deboto sa rehiyon.
Gipasabot usab ni Navarro nga ang kapulisan nagpadayon sa ilang hugot nga pagbantay aron masiguro ang kaluwasan ug kahapsay sa mga syudad ug probinsya sa rehiyon bisan pa man sa pagkahuman sa Semana Santa.
Sa pikas bahin, upat ka insidente sa pagkakalumos ang natala sa buhatan sa Police Regional Office 10 atol sa miaging obserbasyon sa Semana Santa. Usa niini ang nahitabo sa Kibawe, Bukidnon niadtong Lunes Santo diin usa ka menor de edad ang nalumos sa usa ka pool. Dugang pa, sa Biyernes Santo, usa ka hingkod ang nalumos sa suba sa Brgy. Tingalan, Opol, Misamis Oriental. Sa Domingo sa Pagkabanhaw, natala usab ang duha ka insidente: usa sa Lagonglong diin usa ka hingkod ang nalambigit sa jet ski incident ug nahulog sa tubig, ug usa pa sa Barangay Balulang, Cagayan de Oro diin usa ka menor de edad ang nalumos sa suba. (by James Oliver)
