CAGAYAN DE ORO CITY – Mo-epekto na’g sugod ang dugang usbaw sa sulugan sa agri ug non-agricultural sector wokrers sa Northern Mindanao sa Hunyo 18 ning tuiga.
Kini ang gipasalig ni DOLE 10 Director Gilbert Gutib human uyuni sa national wage board ang ilang gihatag nga 40 pesos nga dugang suhulan alang sa wage category 1 aron mahimong 405 pesos gikan sa daily minimum wage nga 365 sulod na sa tulo ka tuig.
Miingon si Gutib nga anaa usab sa 47 pesos nga usbaw ang mabatian sa mga trabahante nga anaa sa category 3 ug 4 nga mo-epekto sa Disyembre 16 ning tuiga.
Samtang dili gihapon gihapon desente ug makabuhi sa ensakto alang sa matag-pamilya ang gihatag nga 40 pesos nga dugang suhulan sa gobierno ngadto sa mga mamumu-o dinhi sa rehiyon.
Kini ang reaksyon ni Nicanor Borja,operations officer sa ALU-TUCP Northern Mindanao kabahin sa duha ka tranches sa minimum wage increase nga ihatag sa mga pribado ug domestic workers sa mga lugar sa rehiyon.
Miingon si Borja nga ‘living wage’ ang ilang gusto alang sa mga mamumuo ug dili kadtong minimum salary nga kanunay’ng shortage alang sa batakang panginahanglan sa kadaghanang pamilya.
Gikuwestiyon usab nila kon nganong gibahin sa duha ka hugna ang paghatag sa maong usbaw-suhulan.
Samtnag gi-depensa ni Gutib kon nganong duha ka tranches sa wage increase ang gipatuman sa rehiyon alang sa mga pribadong mga trabahante niini.
Kini human unang kuwestiyona sa labor sector ang paghatag sa gamay’ng usbaw sa suhulan gibahin pa sa duha ka hugna ning tuiga.
Gibutyag ni Gutib nga gi-balanse lamang usab sa wage board ang kahimtang sa mga mamumu-o ug ang employers nga kabahin sa apektado sa epekto sa pandemya sa COVID-19 sukad nasudlan dinhi sa rehiyon.
